Menu
Cart

Terugploeg

DSCF3679

Terugploeg hou Kersfees

, ,

Dit was gepas om Atterbury Trust se 25ste bestaansjaar af te sluit met ’n groot Terugploeg-uitdeel van kos! Hoe het Vrydag se groot uitdeel verloop? Wie het almal deelgeneem? Vrydag se Kersgroente-uitdeel het absoluut vlot verloop en net meer as 30 organisasies is uitgenooi om elk ’n gros groente te kom haal. Almal wat by Terugploeg werk, het help uitdeel en die Atterbury Trustspan het fluks kom help.  
Kan jy skat hoeveel mense in totaal gaan kos kry oor die feestyd danksy hierdie skenkings? Die meeste van die 30 organisasies wat genooi is, het Vrydag self kom groente haal en die ander het Maandag ook kom kry. Ons skenkers het ’n totaal van 16.3 ton groente afgelaai wat ons kon uitdeel – beet, wortels, aartappels,  botterskorsies, uie en kool. Dit is so min of meer 65 000 porsies!
Wie is die skenkers vir wie ons moet dankbaar wees? Is hulle eenmalige skenkers of is daar mense wat herhaaldelik skenk? In dié geval was dit een donateur wat gereeld skenk en vra om anoniem te bly – hy gee met ’n ope hart elke keer as hy gevra word, vanaf ’n vars groente- en vrugtemark in die Oosrand. Die groente word dan met die hulp van Vibro se trok aangery, wat natuurlik noodsaaklik is – sonder die vervoer sal die groot groente-uitdeeldae glad nie moontlik wees nie. Terugploeg en alle begunstigde organisasies is ewig dankbaar vir die tonne groente wat geskenk en so aangery word. Die realiteit is dat baie skole en ander organisasies wat normaalweg kos uitdeel oor die Desemberperiode sluit en baie mense wat afhanklik is van die daaglikse ete, dan nie kos het nie. Ons is so bly dat Terugploeg wel ’n verskil kan maak hierdie Kerstyd. Dit voel goed om te weet dat hierdie organisasies nou lekker voedsame kos kan uitdeel onder hulle onderskeie gemeenskappe, en ook groente het wat hulle kan verwerk om te hou vir die Kersetes wat hulle verskaf.
Hoeveel kos het Terugploeg oor die afgelope jaar in totaal uitgedeel, en wat hoop julle vir 2024 – wat is jou prioriteite vir die volgende jaar? Ek het so vinning na die statistiek gekyk en vanaf Desember verlede jaar tot Desember 2023 is daar 205 ton groente, vrugte, mieliemeel, koeldranke en vleis uitgedeel vanaf Terugploeg se fasiliteit. Ek hoop dat ons dit in 2024 weer sal kan doen, maar dalk probeer om die verspreiding van die uitdeel beter te kan reel – want daar was sommige maande wat daar nie veel uitgedeel is nie en dan ander maande weer massas, wat amper te veel was op een slag. Ons wil ook probeer om meer gereeld kos te verskaf aan die organisasies buite Gauteng, want vervoer vir hulle en aflewer vanaf ons kant was nie altyd moontlik nie.
Het jy terugvoering wat jy kan deel oor die verskil wat Terugploeg  maak in van hierdie organisasies se lewens? Een staaltjie sal gaaf wees!
Ek kry gereeld terugvoering van die begunstigde organisasies, want ek sien hulle op ’n maandelikse of eintlik tweeweeklikse basis met ons gereelde uitdeel van die kos, klere en huishoudelike items. My absolute hoogtepunt wat om ’n klavier te kon herskenk aan Loerie Jeugsentrum in Bronkhorstspruit. Ons het dit gaan oplaai by die skenker en gaan aflaai met die hulp van al die manne hier by Terugploeg. Ek het ook gereel dat die klavier gestem is.  Nou kan Loerie Jeugsentrum se kinders met musiektalent klavierlesse neem en die ander wat reeds speel kan musiek maak vir die wat net kan luister. Musiek is so ’n belangrike deel van ’n kind se opvoeding.
Is daar ’n spesifieke behoefte wat jy al teëgekom het, waaraan jy wens julle kan voorsien? Van watter soort skenkings het julle meer nodig, of is op jou wenslysie om te probeer in die hande kry? Ons het nog nie so ‘n lysie nie, en dit is beslis iets waarvan ons gaan werk maak. Ons sal vroeg volgende jaar ’n besoek gaan aflê by die begunstigde organisasies om bietjie ondersoek in te stel, en dan kan mens probeer help met spesiale behoeftes. Die meeste organisasies is net so dankbaar vir enige vars produkte wat na hulle kant toe kom.
IMG_20230310_100914_901

‘n Jaar van groei en gee

,

Jeanne van der Sande het ’n jaar gelede by Terugploeg begin werk as koördineerder. Sy vertel ons van haar jaar op die grond by Terugploeg.

Toe jy in 2022 instap by hierdie nuwe pos, wat was jou prioriteite met wat jy wou bereik, en hoe vergelyk die werklikheid vandag met daardie verwagting? Ek het ’n jaar gelede begin werk by Terugploeg en het gehoop dat ek die vermoë het om Lood en Herman se droom te kan laat groei en uitbrei. Ek wou regtig ’n positiewe verskil maak. Ek het nou net gou gaan help kos laai vir ’n kinderhuis en dis onbeskryflik lekker om hulle bussie te kan vol laai en daai dankbare, gelukkige gesigte te kan sien en in jou hart te weet, met die ondersteuning van groothartige boere kan Terugploeg gee met oordaad. Terugploeg maak ’nwerklik  verskil met hulp wat werk! Wat was vir jou die grootste uitdaging oor die afgelope jaar? Ek moes Terugploeg op ’n geloofwaardige en deursigtige wyse bestuur.  Dit was ’n kwessie van goeie organisasie en kommunikasie met al die organisasies. Die werklike behoefte van elk is bepaal en kos word nou dienooreenkomstig uitgedeel. Ek dink die stelsel wat ek sover geïmplementeer het, werk en die laaste paar maande ontvang Terugploeg ook meer skenkings van donateurs sodat Terugploeg amper op ’n gereelde basis kos kan voorsien aan organisasies. Die skenkings is nou so konsekwent dat hier amper permanente voorraad is van groente, vrugte en vleis. Organisasies kan nou op ‘n gereelde basis staatmaak op Terugploeg-donasies. En wat was vir jou die lekkerste deel van die werk? Die uitdeel van kos en die wete dat mens opheffingswerk doen by mense wat werklik nood het. Die ander wonderlike deel van werk by Terugploeg is die bestuur van die mense wat hier werk. Ek probeer hulle leer om my voorbeeld te volg sodat almal die standaard wat daar gestel is, nastreef in hul werk. Ek wil graag hê dat mense wat hier werk regtig trots moet wees op dit wat hulle doen en elke dag hier regtig geniet, selfs al is dit net mense van ARC wat ons op ’n tydelike basis uithelp. Deel bietjie met ons die statistieke van wat, waar en hoeveel Terugploeg bereik het. Waarop is jy die trotsste? Dit is ongelooflik om te dink dat daar vanaf verlede jaar Augustus tot nou meer as 100 ton voedsel uitgedeel is. Dit is nou alles van tonne koeldranke, groente en vrugte, tot mieliemeel en voedsame vleis. Die verblydendste vir my is egter dat ons nou baie meer wildsvleis en nou ook beesvleis inkry om uit te deel. Dit is nie net die toename in vleisverwerking vir jagters nie, maar ook die feit dat ons jagtervriende met soveel oorgawe skenk. Daar is hierdie jagseisoen al meer as 10 ton wildsvleis verwerk waarvan byna vier ton uitgedeel is. Dit is sulke gesonde proteïen wat voorheen glad nie so gereeld vir die liefdadigheidsiorganisasies beskikbaar was nie. Waarmee is julle tans besig, en wat is die huidige prioriteite vir die organisasie? Ons is baie opgewonde oor die nuwe groenteprojek wat ons in samewerking met Dirkl van der Walt se Aquafer Stigting aanplant. Dit beteken dat daar deurlopend ook groente wat organies verbou word, by die vleis sal wees wat ons kan uitdeel. Ons het onlangs ook ’n boomplantdag hier by Terugploeg gehad waar 40 sitrusbome wat deur Plantland met die bemiddeling van GrootFM90.5 geskenk is –  ons het nou ’n mooi sitrusboord! Dis regtig fantasties om die hele tyd sulke nuwe toevoegings by Terugploeg te kan help organiseer. En hoe lyk die pad vorentoe vir Terugploeg – wat wil jy graag in die volgende jaar sien gebeur? Ek dink die boerdery-deel hier by Terugploeg gaan uitbrei van kompos maak tot uiteindelik groente kweek en die konstante uitdeel van vleis. Hoe meer daar is, hoe meer kan ons uitdeel.Ons gaan ook hopelik werk kan verskaf aan mense van die liefdadigheidsorganisasies. Dit is vir ons belangrik om mense se menswaardigheid te verhoog en dit is verblydend dat mense bemagtig word hier by Terugploeg. As mense belangstel om betrokke te raak, wat is die opsies, en hoe hoor hulle meer? Behalwe kos, deel Terugploeg ook en klere en gebruikte huishoudelike ware uit en ons deure is altyd oop vir enige skenkings. Enige finansiële bydra is natuurlik ook welkom, deur die gewone Atterbury Trust kanale – sien Donasiewinkel. Kontak my gerus per epos by jeanne@terugploeg.co.za as jy enige skenking wil maak.
Terugploeg-en-Faces-avontuurpark-Web-post-header-1200by800-800x533-1-1200x600

Terugploeg en Faces se nuwe avontuur-park

, ,

Goeie nuus vir Gauteng se bergfietsryers en stappers – ’n splinternuwe fasiliteit met avontuur-roetes maak eersdaags in die noorde van Pretoria oop, as ’n vennootskap tussen Terugploeg en Faces. Laasgenoemde se eienaar, die Pretoriase fietsrylegende, Fritz Pienaar, vertel wat om te verwag. Vertel ons meer oor Faces– hoe lank bestaan dit al en wat bied julle alles aan? Faces is al 20 jaar oud en het begin met bergfiets-wedrenne in 2002. Ek was self ’n ernstige bergfietsryer toe ek die besigheid saam met twee vennote begin het. Ons wou bergfietsry aan meer mense bekendstel en ook die sport meer professioneel maak, so ons het ’n nasionale bergfiets-reeks gestig wat eers deur Mazda Drifter en later deur MTN en Ashburton geborg is. Hoe het Faces se vennootskap met Terugploeg gebeur, en wat is die idee daaragter? Ek ken vir Herman Marx, een van Terugploeg se stigterslede, persoonlik en het by hom gehoor van Atterbury se planne rondom die First Land-eiendom in die noorde van Pretoria waar daar ’n gedeelte is wat dalk ontwikkel kon word tot  ’n avontuur-roete vir fietsryers en stappers. Ek het dadelik die potensiaal van die grond gesien en ek het met Herman en sy mede Terugploeg-stigter Lood Bester ontmoet en ons het die vennootskap gevorm. Faces bou baie paadjies vir ons wedrenne, so ons het reeds die toerusting en kennis om dit te doen, so dit het vir ons sin gemaak. Terugploeg help met die ontwikkeling en sal deel in enige inkomste wat deur die park gegenereer word, en sodoende gee ons ook terug aan die gemeenskap en help om Terugploeg nog meer volhoubaar op die lang termyn te maak. Wat is die omvang van die nuwe fasiliteite by First Land; en op wie mik julle dit? Ons beoog om veilige roetes vir fietsryers, stappers en veldlopers (“trail-runners”) in te rig. Daar sal maklike roetes wees vir beginners of ouens wat fietsry of stap vir ontspanning, maar ook meer uitdagende roetes vir ernstige fietsryers en veldlopers.  Daar sal ook vrylopende wild in die park wees – koedoes, rooibokke, selfs kameelperde, so ons verwag ook dat dit ’n gesins-ontspanningsbestemming sal wees. Hoe ver is julle al met die ontwikkeling, en weet julle al wanneer dit sal oopmaak? Wat gaan die naam wees? Die park se naam gaan “Die Bosveld Trail and Function Venue” wees. Ons het tans sowat 20km se fietsry-roetes oopgemaak asook die eerste 3km van die stap/drafroetes. Daar is wel nou spanne wat elke dag werk om verdere roetes te bou. Ons beoog om die park op 15 Julie oop te maak, en teen dan sal ons reg wees met fietsry-opsies van 10km, 30km en 45km, en stap/drafroetes van 5km en 10km. Is daar enige uitdagings wat oorkom moes word om die ontwikkeling te laat gebeur? Ons moes ’n omgewings-impakstudie laat doen en daar is streng reëls ingestel met riglyne oor wat ons mag doen. Ons bou alles met die hand en sonder groot toerusting deur dele wat baie digte bosse bevat, so die vordering is soms baie stadig. Dit is wel uiters mooi terrein. Hoe kan mense meer uitvind oor die opsies wat julle aanbied en wat dit sal kos? Die webwerf word tans gebou – www.diebosveld.co.za – en al die inligting asook die permit-verkope sal daarop wees. Daar sal opsies wees vir eenmalige toegang of maandelikse en jaarlikse opsies. Beplan julle iets spesiaal vir die opening? Ons beplan ’n groot opedag waar ons fietsryers, stappers en hardlopers sal nooi. Daar sal iets te ete en drinke wees, en allerhande ander verrassings. Vir meer inligting, kontak vir Fritz by fritz@faces.africa
f8de414c-bb78-4388-9d63-26b9dea6075d-2-2-800x533-1-1200x600

Terugploeg se vleis-fundi vertel

, ,

Waar kom jou liefde vir die vleisbedryf vandaan en hoe het jy by Terugploeg beland?
Ek is in Zimbabwe gebore en ná universiteit in Suid Afrika is ek terug Zim toe waar ons met beeste en wild geboer het. Ek en Jeanne is in 1991 getroud en het ’n jagbesigheid begin, waarna ek vir 13 jaar professioneel gejag het. Die Europese jagmark was ons teikenkliënte, en daar is baie grootwild gejag, wat ons van die begin af met die hand bewerk het – ons het nooit wildsvleis gemors nie. In 2005 met die politieke ontstuimigheid, het ons met ons drie dogters Suid-Afrika toe getrek, waar ek by Feinschmecker se delikatesse-onderneming aangesluit en hul produksie van vleisprodukte hanteer het. Ek het baie van vleisverwerking geleer by ‘n jagkliënt uit Duitsland; die vervaardiging van salamis, pancettas en so meer. Daarna was ek by Eskort waar ek hul winkels behartig het, en so kleinhandelondervinding opgedoen het.

Wildspryse het in 2016 baie begin daal en ek het geweet dat wildsveisverwerking baie afgeskeep word, so toe sien ek die geleentheid en raak betrokke by die bou van ’n vleisverwerkingsfasiliteit in Silverton, spesifiek vir wildsvleis. Ons het vleis verwerk vir individuele jagters en vir korporatiewe jaggroepe, en baie lekker produkte daar ontwikkel – carpaccio, salami, spek, ham van vlakvark, ensomeer –  wat ons dan ook aan lodges verskaf het. Ons het die besigheid net voor Covid verkoop en ek het toe vir Enterprise gekonsulteer. So ja, die vleisbedryf was nog altyd deel van my lewe! Wat Terugploeg betref, is ek en Jeanne jarelange vriende met Zahn Hulme en haar man, Alten, en toe Zahn ons vra om ons kundigheid by Terugploeg te kom inspan, het ons albei graag betrokke geraak. Jeanne is die koördineerder daar.

Hoekom spesifiek wildsvleis?
Stadsmense het selde toegang tot wildsvleis en Terugploeg bring wildsvleis stad toe, en binne die bereik van mense wat nie hierdie gesonde proteïenbron kan bekostig nie. Ek is van die oortuiging dat wildsvleis by verre die gesondste vleis is wat vandag beskikbaar is – daar is geen antibiotika of hormone betrokke nie en die dier loop vry in die natuur. En ook, omdat Terugploeg staatmaak op skenkings, is dit relevant dat wild meer bekostigbaar is om te skenk as byvoorbeeld ’n bees, wat soveel hoër insetkoste het vir die boer.

Die jagseisoen is op ons en Terugploeg doen nou ’n beroep op jagters – vertel ons meer?
Die jagseisoen begin inderdaad dié maand – die meeste aanwas is teen dié tyd gespeen – en die hoogtepunt is Junie tot Augustus. As dit droër is en die blare geval het, is die sig beter. Jag vind oral in die land plaas, en dit hou wildboere aan die gang. So ons adverteer nou by jagters, en bied ons dienste aan om hulle vleis hier by Terugploeg se verwerkingsaanleg vir hulle te verwerk, ten einde geld te genereer om nog vleis te kan aankoop. As hulle meer geskiet het as wat hulle kan gebruik, of trofeejagters is, kan hulle die karkasse vir ons skenk, en as hulle nie die bene wil hê nie, aanvaar ons dit ook graag.  Dit is wel baie belangrik dat wildsvleis reg voorberei word pas ná die jag.[/vc_column_text][vc_row_inner][vc_column_inner width=”1/2″][vc_column_text uncode_shortcode_id=”152969″]Wat is die geheim – gee julle vir jagters voorskrifte?
Wat in die veld gebeur is baie belangrik vir die smaak van die vleis. Dit het te doen met die manier van jag en ook wat direk daarna gebeur. Adrenalien speel ’n groot rol in enige vleis – dit maak die vleis taai en gee veral wildsvleis ’n onaangename reuk. So die vleis van diere wat gejaag is met bakkies en van daar af geskiet word, is ’n heeltemal ander storie as ’n bok wat te voet gejag word en minder stres ervaar. As ’n bok geskiet is, moet hy so gou moontlik uitgebloei word en die binnegoed moet uitgehaal en die karkas afgekoel word met water. En sodra die jagters by ’n slagfasiliteit kom, moet die karkas vel en al afgespuit word om dit te was en verder te verkoel. Ons stel voor dat die vel vir ’n dag of twee aangelos word omdat dit keer dat die vleis uitdroog. Wild het nie die vetlaag wat beeste het nie, so dit droog baie vinnig uit. (Wanneer dit kom by die verwerking van wildsvleis, aanvaar geen verwerkers karkasse wat nog die vel aanhet nie.) Skootplasing is ook belangrik vir die jagter, want daar is baie vleisverlies as die dier in die buik getref word – jy kan niks met daardie vleis doen nie.

Hoeveel wildsvleis (in kg of aantal karkasse?) hoop julle om met hierdie oproep bymekaar te kry, en hoeveel maaltye sal dit vir Terugploeg beteken?
As ons so 12 ton vleis kan kry (omtrent 120 diere) sal ons rondom 120 000 etes kan verskaf. By Terugploeg se slagpale sny ons die vleis van die bene af, maal die vleis en verpak in 100g porsies. Ons verpak die vleiserige bene vir bredies en sop. En reg voorberei, kan bevrore vleis gevries so lank as 18 maande geberg word. Ons sal so dan voorraad hê wat baie honger mae met gesonde proteïen kan vul.

Hoe gaan dit werk – as iemand wil jag en bydra, wat moet hulle doen? Hoe kom geskenkte vleis by die Terugploeg-fasiliteit uit?
Jagters kan ons kontak by info@terugploeg.co.za en 066 283 1786; ons sal selfs kom oplaai by plase binne ’n radius van 450km indien daar genoeg vleis van die regte gehalte geskenk word.  Mense wat nie self jag nie, maar wat byvoorbeeld bokke beskikbaar het, kan ons kontak, en ons kan dan ’n jag reël en die vleis agterna kry – ons hanteer alles vir die boer. Die idee is om geld te genereer om meer vleis te kan inkoop, want ons kan nie uitsluitlik steun op donasies nie. Boere gee maklik as dit goed gaan, maar op die oomblik is proteïen duur, want voerpryse is baie hoog.[/vc_column_text][/vc_column_inner][/vc_row_inner][vc_column_text uncode_shortcode_id=”186598″]En as ek nie jag of bokke het nie, kan ek steeds bydra?
Ja, beslis, soos ek genoem het, moet ons ook vleis inkoop en daarvoor is donasies baie welkom. Ons het ook al beesvleisdonasies gekry, dit is ook altyd welkom.

Ons verkoop ook van die droëwors en wildsvleis onder Terugploeg se handelsmerk – by Atterbury se kantoor by die Klubhuis in Hazelwood en ook eersdaags by Atterbury Trust se kantoor by La Gratitude in Stellenbosch. Dis ’n advertensie vir die kwaliteit vleisverwerking wat ons by Terugploeg doen en ons dek ons sodoende ’n gedeelte van die dag-tot-dag operasionele uitgawes om Terugploeg se hulp wat werk aan die gang te hou.

Terugploeg se verwerkingspryse
Basiese prosessering/breek van karkasse (biltong ingesluit)
 R13/kg
Droëwors, Derms en Beesvet R35/kg
Biltong (droog) R13/kg
Droëwors (droog) R13/kg
Wildswors  R45/kg
Dunderms R50/kg
Maalvleisverpakking R5/kg
Alle verpakking (vakuumverpak)  R5/kg
Burger patties  R35/kg

Kontak Terugploeg by info@terugploeg.co.za of 066 283 1786 vir meer inligting.

Jeanne-vd-Sande-2-800x533-1-1200x600

Vele hande maak Terugploeg werk

, ,

Soos Terugploeg groei, groei die behoeftes en ook die kennis oor hoe om die meeste te maak van al die wonderlike donasies en welwillendheid van baie mense. Danksy Terugploeg se nuwe koördineerder, Jeanne van der Sande, draai die wiele daagliks gladder.

Vertel ons hoe die paadjie geloop het wat jou by Terugploeg gebring het?
My pad het met Terugploeg gekruis danksy my en my man, Diets, se vriendskap met Zahn en Alten Hulme. Diets het in Duitsland die spesialiskuns van vleisverwerking bemeester en het jarelange ondervinding en kundigheid in die Suid-Afrikaanse bedryf waar hy onder andere by Feinschmecker, Eskort en Enterprise gewerk het. Zahn het voorgestel dat Diets by Terugploeg betrokke raak en adviseer by die nuwe slaghuis se wildsverwerkingsfasiliteit  Toe ek sien waaroor Terugploeg alles gaan, het ek dadelik geweet ek wil ook betrokke raak en help met die dag-tot-dag bestuur. Toe Ananja Koen my net daarna vra om juis dít te doen, het ek dadelik ja gesê!

Ek het nogal ’n interessante loopbaan gehad van marknavorsing net na my Huishoudkunde graad aan die Universiteit van Pretoria tot boervrou in die laeveld van Zimbabwe. Dis hier waar ek ontwikkel het om te kon help met die bestuur van groot bees- en wildsplase, maar ook om in die wildskamp gourmetkos vir ons Duitse jagkliënte te kon aanbied. Ek moes baie dinge organiseer. Ek het hier my Duits opgeskerp en by die Europese nasie geleer as jy iets doen, doen dit na die beste van jou vermoë. Dit gee net soveel selfvertroue om te weet mens doen iets goed. Ek het die span werkers op ons plaas en sommer vir my kinders ook gewys om passievol alle uitdagings van die lewe met moed aan te pak en dat sukses lei tot selfvertroue.

Wat is dit omtrent Terugploeg wat jou aangetrek het?
Ek bestuur graag mense om hul beste te bereik en eintlik vir hulle te wys waartoe hulle in staat is, en dat alles moontlik is met harde werk en toewyding.

Ek vereenselwig myself met alles waarvoor Terugploeg staan: ek gee graag en ek help graag, gee aan dié wat minder het, en deel; dis regtig my motto in die lewe. Dis ’n groot voorreg om deel van Atterbury Trust se Terugploegspan te wees. Ek glo dat as ons by Terugploeg die donasies op die regte manier uitdeel sal dit net van krag tot krag gaan.

Wat behels jou rol alles? Hoe lyk ’n tipiese dag?
My rol as koördineerder is hoofsaaklik om te kommunikeer met die begunstigde organisasies oor die afhaal van produkte by Terugploeg, en om dit te bestuur en organiseer. Dis ’n kwessie van beplanning, en dan skeduleer ek net die oplaai en hou deeglik rekord van wat inkom en uitgedeel word.

Terugploeg is nog nuut en ek is seker daar is gereeld nuwe uitdagings wat uitgestryk moet word. Vertel ons van so een, en hoe jy dit aangepak en opgelos het?
Die groot uitdaging by Terugploeg was om ’n georganiseerde stelsel in plek te kry sodat almal weet wat om te doen en hoe om dit te doen sodat die dag en die take vlot verloop. ’n Voorbeeld was toe die vleisverwerkingseenheid oopgemaak het, moes die blokmanne die skoonmaak- en gesondheidsreëls van ’n slaghuis geleer word, en daar moes gesorg word dat hulle dit effektief toepas. Dit is nou alles in plek.

Wat geniet jy die meeste omtrent die werk? Kan jy dink aan een onlangse insident wat dit vir jou opsom?
Dit is elke keer so lekker om die produkte wat ons by ons groothartige borge kry, te kan gee aan mense wat dit werklik nodig het, en dan om soveel mooi dankie e-posse, oproepe en Whatsapps te ontvang. Dit doen iets vir die hart om daardie absolute dankbaarheid vir die donasies en die hulp wat gegee word te sien, en te besef ons maak werklik ’n verskil.

Vertel ons iets oor jou gesinslewe en wat julle graag as gesin saam doen.
Ek en Diets is 30 jaar getroud en was 13 jaar in Zimbabwe. Daarna moes ons in Pretoria weer van vooraf begin met nuwe beroepe. Ons het albei begin werk by die vleishandelaar Feinschmecker In Germiston, wat danksy ons Duitse konneksies op ons radar gekom het, en dit was die begin van ons loopbane in die vleisbedryf. Ons het drie dogters – die oudste twee is albei geoktrooieerde rekenmeesters; oudste in Amsterdam en die tweede hier by PwC in Johannesburg. Ons jongste woon in Kaapstad en werk by ’n tegnologiefirma. Ons as gesin kuier graag in Afrika; ons is so lief vir die natuur, wild en voëllewe en is baie saam in die wildtuin, maar ook soms saam by die see. Ons gaan nou juis einde Oktober Victoria Watervalle toe om Diets se 60ste verjaarsdag te vier. Ons is almal passievol oor die lewe en die Skepping en die ongerepte natuur van Zimbabwe.

J-Pauw-foto1-2-1024x683-1200x600

’n Bestuurder se Kans om terug te ploeg

, ,

Terugploeg het aan die begin van die jaar die fokus van ’n algemene bestuurder gekry, in die vorm van Jacques Pauw, wat voorheen ’n onderwyser by Hoërskool Maragon in Mooikloof was. Hy vertel ons meer van sy nuwe rol. Van onderwyser tot hulp-organisasie se bestuurder… vertel ons hoe jy en Atterbury se paadjies gekruis het? As gelowige mens glo ek dat die paadjie so vir my beplan was. Ek beskou dit nie as ’n blote toevalligheid dat my paaie met dié van Atterbury en Terugploeg gekruis het nie. My liefde vir onderwys het uiting gevind in my verhoudinge met kinders en medepersoneel. Dit was eintlik soos ’n uitreik na my medemens wat nou weer by Terugploeg in ’n ander formaat plaasvind. Wat is dit omtrent Terugploeg wat jou aangetrek het, en wat het jou die skuif laat maak? Terugploeg en die mense en instansies wat Terugploeg ondersteun, het my diep geraak en het my laat besef dat daar tog steeds baie mense is wat “omgee” en dit wat hulle bereik het, inderdaad terugploeg in die gemeenskap. Jy is nou sowat twee maande in die rol – hoe vergelyk jou verwagtings vooraf met die realiteit? Atterbury Trust het dit van die begin af duidelik gemaak dat dit ’n nuwe pos is waarin ek self die koers moet bepaal. Met dit in die agterkop het mens nie korttermyn-verwagtings gehad waar jy binne twee maande sou wees nie en het dit maar aanvanklik ’n rukkie gevat om my voete te vind. Dit voel egter of ek elke dag iets nuuts leer, wat vir my lekker is. Dit was juis een van die redes waarom ek die skuif gemaak het, om ’n nuwe uitdaging aan te pak. Gee vir ons ’n voorbeeld van ’n Terugploeg-dag wat jou sover geïnspireer het? Een van Terugploeg se begunstigdes is ’n projek wat by ’n laerskool in Centurion families wat in nood is, ondersteun. Terwyl ons besig was om die kospakkies voor te berei, het daar ’n leerder verbygestap en aandagtig na die hopies kos gestaar en toe met trots gesê, “My gesin is een van die gesinne wat so ’n hopie kos kry.” Dit het my diep geraak en herinner aan die feit dat kinders nie kan droom as hulle honger is nie. Sonder om name te noem, was en bly dit inspirerend wanneer vars kos, vleis en meel aan ouetehuise wat in nood is, oorhandig word, om hulle onvoorwaardelike dankbaarheid te sien en ek geniet dit ook om op ’n persoonlike vlak met hulle te gesels en hulle moontlik te bemoedig. Hoe lyk ’n tipiese dag in die rol – wat is alles op jou doen-lysie? Op hierdie stadium is daar absoluut geen tipiese dae nie, en bied elke dag sy eie uitdagings. Sommige dae is ek by die logistieke van uitdeel betrokke, ander dae skakel ek met die onderskeie donateurs wat kos aanbied en dan is ons Trustspan ook besig met die beplanning en inrig van die vleisverwerkingsfasiliteit wat ons in die nuwe Terugploeggebou gaan vestig. O ja, ons is ook hard besig om die mooontlikhede van werksgeleenthede wat deur Terugploeg gefasiliteer word, te ondersoek. Ons wil graag aan werklose mense die geleentheid bied om ’n verskeidenheid van ambagte en vaardighede aan te leer. Daar is geleenthede vir karwagte, blokmanne, en so meer. Wat is jou visie as algemene bestuurder – hoe hoop jy om by te dra tot Terugploeg se sukses, en hoe hoop jy om Terugploeg te sien ontwikkel? Die oorspronklike visie met die totstandkoming van Terugploeg was om ’n verspreidingspunt te wees waar instansies met dieselfde doelstellings saamkom om sodoende ’n groter verskil te kan maak. Hierdie visie is die kern wat op die korttermyn vergroot en uitgebrei moet word. Op die langtermyn is die visie om Terugploeg te ontwikkel as instansie wat regtig aan die naam “Terugploeg”, betekenis gee. My wens is dat Terugploeg ’n baken van hoop sal wees waar nie net kos uitgedeel word nie, maar mense ook bemagtig kan word om eendag moontlik self terug te ploeg en om mense in die algemeen op te hef. Dit gaan in kort dus nie net oor die kos nie, maar ook die mens. Vertel ons meer van Boersaam? Sonder om op die stadium te veel weg te gee, is Boersaam ’n Terugploeg inisiatief wat dit gaan moontlik maak vir goedhartige beesboere en die publiek om saam te boer om ’n verskil in die gemeenskap te maak. Hou die inisiatief dop, want hier kom nog groot dinge – so vroeg as Aprilmaand! Laastens, wie is Jacques as hy by die huis is? Saam met wie woon jy? Waar bly jy? Wat geniet jy om in jou vrye tyd te doen? Ek is baie familievas en ag my familie as ’n prioriteit in my lewe. Ek woon in die ooste van Pretoria, waar ek ook grootgeword het, saam met my pragtige vrou Lelani en my twee hondekinders, Eddie en Steve, albei beagles. Ek geniet dit om tyd saam met my vrou deur te bring en daar is min dinge wat ek so geniet soos ’n kuier om ’n braaivleisvuur met vriende en familie. Wanneer ek enigsins ’n kans kry, is ek mal daaroor om na die bosveld toe te gaan. Ek geniet veral voëlkyk en kamp.
Dirk-en-Lize-van-der-Walt--1024x768-1200x600

Die groot harte agter Terugploeg

, ,

Die Terugploeg inisiatief om honger te bekamp sou nie moontlik gewees het sonder die insette en ondersteuning van ’n hele groep weldoeners nie. Een van hierdie sakemanne met hart is Dirk van der Walt van WeBuyCars, wat al baie lank deel is van Atterbury se sirkel van vriende en weldoeners. Ons het met hom gesels oor die illusie van sukses, die rol van harmonie, en hoe die privaatsektor ’n wesenlike verskil aan maatskaplike nood kan maak. Kom ons begin met ’n 2021 oorsig van WeBuyCars; omtrent ‘n Afrikaanse suksesstorie! Wanneer het jy en jou broer Faan die maatskappy gestig, en hoe het die idee daarvoor onstaan? Dit het als begin met Faan se eerste kar, ’n blou Volkswagen 412, wat hy verbeter en toe verkoop het. Ons het WeBuyCars in 2001 begin, met omtrent R250 000 wat Faan gespaar het terwyl hy en sy vrou, Tanja, vir twee jaar in Engeland gaan skoolgee het, en ek besig was met my bemarkingsgraad. Ons eerste perseel was ’n kleinhoewe in Pretoria-Oos, en vir baie jare was dit net ons twee, wat alles gedoen het. In 2010 het ons ons eerste “car warehouse” in Pretoria gekoop, met plek vir 100 karre, en binne ses maande was dit ook nie meer groot genoeg nie.  Ons het organies aanhou groei, landwyd uitgebrei, en in 2020 het die besigheid aanlyn gegaan wat ’n hele nuwe dimensie gebring het. ’n Hoogtepunt was toe ons in 2019 die Afrika Entrepreneur van die Jaar-toekenning (AABLA) gewen het; dit was wonderlik om die erkenning te kry. Vandag het ons sewe persele landwyd en meer as 1 000 werknemers; asook aandeelhouers om gelukkig te hou! Het julle ooit destyds gedink dat dit so ongelooflik suksesvol sou wees? Waaraan skryf julle die sukses toe; en wat is julle visie met die maatskappy? Weet jy, sukses is ’n illusie. Sukses is as jy regkry wat jy onderneem het om te doen, maar die realiteit is dat die lewe dinamies is en die einddoel heeltyd verskuif, wat dit moeilik maak om te sê of ek bereik het wat ek onderneem het om te doen. Vir meeste “suksesvolle” mense het dinge heeltemal anders verloop as beplan, en hulle sogenaamde sukses kom eintlik neer op oorlewing, en geluk. So ons ag onsself baie geseënd dat dinge vir ons uitgewerk het. Alles in die lewe gaan oor harmonie en wederkerigheid; daar is geen geheime formule vir sukses nie. Die goue reëls is eerstens dat jy baie nuuskierig moet wees, ’n behoefte moet raaksien, dan genoeg werk insit om te verstaan hoe dit werk en hoe jy daardie behoefte kan vervul en selfs nóg meer waarde kan toevoeg. En tweedens moet jy ander mense behandel soos jy self behandel wil word.  Wanneer jy die kloutjie by die oor bring dat jou werknemers ook jou kliënte is, en dat jou hele operasie afhang van die toewyding en passie van die mense wat vir jou werk, en dat hulle jou hande sterk maak, dan is jy op die regte pad. Die draaipunt vir WeBuyCars het gekom toe ons besef het dat daar ’n tyd kom dat jy nie meer in die besigheid moet werk nie, maar aan die besigheid. Om te groei moet ons ander mense bemagtig en vertrou om die werk te doen. Dis normaal vir enige entrepreneur om te dink dat niemand jou idee en jou werk so goed kan uitvoer soos jouself nie. Maar die waarheid is dat ander mense dinge selfs nog beter kan doen, en soos jy ander mense bemagtig, so kan jou besigheid eksponensieel groei. Julle is ook een van die hoofborge van Terugploeg – hoe het julle by hierdie inisiatief betrokke geraak? Ons ken vir Atterbury en Louis van der Watt deur Fledge Capital, wat een van ons aandeelhouers by WeBuyCars is … Louis, Konrad Fleischholder, Lood Bester en die ander aandeelhouers van Fledge het die gees en energie raakgesien, en in ons geglo en geïnvesteer. Toe ons sien dat hulle in ons glo, het ons ook in onsself begin glo. Dit het ons in staat gestel om die mark met groot oortuiging aan te pak. Ons ken die Atterbury Trust dus al geruime tyd. En toe Lood met die idee vir Terugploeg vorendag kom, wou ons daarvan deel wees. Ons het die voorbeeld gesien van Herman Marx van Vibro en Lood, wat destyds in die erge droogte saam met Caring Daisies trokke vol voer vir Vrystaatse boere aangery het – dit was ’n klomp mense se inisiatief en dryfkrag en ons wou graag ’n bydrae lewer. Afgesien daarvan was teruggee nog altyd ’n intrinsieke deel van WeBuyCars se waardes; ons het byvoorbeeld ’n welwillendheidsprogram wat betrokke is by die werksaamhede van verskillende welwillendheidsorganisasies. WeBuyCars het ’n stuk grond beskikbaar gestel vir die bou van die Terugploeg-sentrum. Hoe direk bly julle betrokke by die sentrum, en hoe sien jy die toekoms van hierdie projek? Die projek word deur die Atterbury Trust saam met Lood, Louis en Herman gedryf en ek is genooi om deel te neem. Ek help met die besluitneming, asook donasies, en ons bly so betrokke soos wat die projek dit benodig. Dis ’n groot plesier om ons entrepreneursbenadering en ons besonderse werksetiek en werksfilosofie te kan inspan om te help om oplossings te vind soos die projek ontwikkel. Jy en Lize het benewens ’n ruimhartige kontantdonasie ook ’n werksgeleentheid by Terugploeg geskep – Faans van Zyl is die nuwe algemene bestuurder daar en julle borg onder andere sy salaris. Hoe ken julle vir Faans, en hoe het dit gebeur dat julle hom en Terugploeg bymekaargebring het? Met Faans deel ons baie van dieselfde hart en dieselfde oortuigings. Ek het dit in Faans raakgesien; hy is ’n ontsettende opregte mens met baie goeie bedoelings, hy is ervare en hardwerkend, en ek weet dat ek iemand soos hy kan vertrou. Dis hoekom ons hom die geleentheid gegee het. Die Covid-19 pandemie en sy nadraai gaan nog lank met ons wees; hoe voel jy oor die rol van die privaatsektor om bystand te gee aan behoeftige gemeenskappe? Ek dink almal – skole, kerke, welwillendheidsorganisasies – moet alles wat hulle doen in heroorweging neem en terugkom na die daaglikse, praktiese behoeftes van mense; sonder om enigsins die langtermyn-doelwitte te misken. Daar word verskriklike goeie werk gedoen deur organisasies wat meer op die langtermyn-doelwitte toegespits is. Maar so belangrik soos hierdie langer-termyn fokus is, moet ons nie die kort-termyn doelwitte onderskat nie. Met Covid het daar ontsaglike maatskaplike nood ontstaan wat nog radikaal gaan toeneem, en ek glo ons gaan nog geskok word deur die nadraai daarvan. Een van ons doelwitte is om die talle organisasies wat by welwillendheid betrokke is, te help koördineer om duplisering te beperk. Ek wil mense aanraai om meer betrokke te raak sodat hulle weet wat met hulle donasie gebeur. Dit is ideaal as dit nader aan die huis is, sodat jy soms kan deelneem aan die hele inisiatief eerder as om blindelings ’n donasie te gee en geen idee te hê waarvoor dit aangewend word nie. Wat is jou hoop vir die Terugploeg-projek? Het jy enige spesifieke persoonlike aksies wat jy hiermee hoop om te bereik (dalk werksgeleenthede vir nog mense soos Faans)? Soos dit uitbrei, sal die behoefte aan ekstra mense toeneem en daar sal sekerlik nog werksgeleenthede ontstaan. En net uit my eie oogpunt, glo ek dat voedselverskaffing en voedselverwerking net belangriker sal raak. Ek glo ons moet baie nader beweeg aan landbou, en betrokke raak by goed soos tonnelverbouing van kos; die produksie-aspekte van kos en die werksgeleenthede wat daarmee saamgaan. As jy in die toekoms kon inkyk, waar sou jy graag vir Terugploeg wou sien oor vyf of tien jaar; en hoe betrokke wil julle bly? Ek hoop dat ons oor vyf jaar reeds ’n sterk koördinasie- en verspreidingsmodel in plek sal hê, sodat ons grootskaalse donasies van goedere kan ontvang en versprei – oor die hele Suid-Afrika. As jy wil bydra tot Terugploeg, sien hier vir meer detail oor projekte en hoe om te skenk.
DSC_7234-e1649084148678-1024x612-1200x600

Terugploeg se hulp wat werk

, ,

Die COVID-19 pandemie het baie swaarkry voor Suid-Afrikaners se deure gelê, maar dit het ook wonderlike inisiatiewe van naasteliefde en omgee tot gevolg gehad.

Terugploeg is een so ’n idee wat nou tot sy volle reg gekom het. Volgens Lood Bester, mede-stigter van Terugploeg, is hierdie konsep gebore in gesprekke tussen hom en sy vriend Herman Marx van Vibro Bricks. Bester sê toe hulle gedurende die inperking bewus geraak het van die enorme kosnood in sekere Afrikaanssprekende gemeenskappe en dat daar vir hulle geen hulp beskikbaar gestel is nie, wou hulle graag help. “Reg aan die begin het ons kos aangekoop, wat ons dan self in van hierdie gemeenskappe rondom ons versprei het. Later het ons gaan aanklop by ons boere-vriende om ons idees met hulle te deel. Almal het dadelik ingestem om vir ons kos te skenk. So stuur ons byvoorbeeld deesdae een van Herman se trokke na ’n plaas toe, wat ons skenkers vol laai met tussen 3 en 8 ton groente of vrugte. Dit word daarna by Vibro Bricks in Pretoria afgelaai. Daar word die kos verdeel in kleiner porsies, op bakkies gelaai en verder versprei onder ouetehuise, kinderhuise en skole wat ons geïdentifiseer het, waar daar spesifiek kosnood is.” Terugploeg is ’n netwerk van weldoeners wie se skenkings verantwoordelik bestuur word om eerstens kos te verskaf aan weerlose Afrikaanse gemeenskappe en honger te bestry. Maar daar bestaan ook ’n groter droom – dat dit ’n volhoubare projek word wat ook werk kan verskaf aan mense uit hierdie gemeenskappe, sodat hulle weer kan hoop en droom van ’n beter toekoms. Hoop, respek, vaardighede en geleenthede is geweldig belangrik vir hulpbehoewendes. Volgens Zahn Hulme, uitvoerende trustee van Atterbury Trust, pas die Terugploeg inisiatief gemaklik in by die ander liefdadigheidsprojekte wat vanuit die trust bestuur word. “ ’n Maand of wat nadat Lood en Herman die inisiatief van stapel gestuur het, het hulle met die Atterbury Groep se hoof uitvoerende beampte Louis van der Watt ooreengekom om Terugploeg vanuit Atterbury Trust te bestuur.
“Die voordeel van die verbintenis is dat die trust meer as twee dekades se ervaring van liefdadigheids-projekadministrasie het, asook die infrastruktuur om sulke teruggee-projekte effektief te bestuur. Ons is ook trots op ons reputasie vir betroubaarheid en deursigtigheid.”
Terugploeg het so vinnig gegroei dat hulle reeds uit hul nate bars. “Ons het gou besef dat ons ’n goed toegeruste en maklik toeganklike perseel nodig het sodat ons groot hoeveelhede kos op een slag kan ontvang, kan verwerk indien nodig, en kan berg tot tyd en wyl ons dit wil uitdeel,” verduidelik Bester. “Ons het agtergekom dat as dit kom by voedingsprogramme is die kontinuïteit van ’n bord kos elke tweede dag baie belangriker as ’n hele wavrag kos wat op een slag afgelaai word by iemand wat in ’n Wendyhuisie woon – sonder ’n koelkas. As ’n boer ’n paar beeste of bokke skenk, moet ons dit in maalvleis kan verwerk, en kan stoor sodat ons dit selektief kan uitdeel waar dit nodig is.” Faan en Dirk van der Walt, die stigters van WeBuyCars, het hierdie groot struikelblok uit die pad gerol deur agt hektaar grond in die ooste van Pretoria – teen die N4, digby die Rayton afrit – aan Terugploeg beskikbaar te stel. “Ons kan hierdie perseel nou gratis gebruik om ’n hoofkantoor vir Terugploeg te vestig,” sê Bester. Benewens die kosverwerkings-fasiliteit en koelstoor, word ’n groente- en vrugtetuin beplan, asook ’n klerebank. Bester-hulle beplan verder om braaihout daar te laat sny en verpak vir verkoop. “Al hierdie funksies het hande nodig; om die tuine te versorg, die kos te verwerk, die klere wat ons inkry te sorteer, was en stryk, die vragte hout te verpak in braaipakke… hiermee wil ons werk skep vir die mense uit die gemeenskappe wat ons bedien,” vertel hy opgewonde. Verder word daar beoog om ’n lesingsaal in die gebou in te rig, waarin kursusse en praatjies aanbied kan word om beide skoolkinders en volwassenes te inspireer met praktiese raad en opleiding, sodat hulle ook hul eie omstandighede self kan verbeter. Die opening van die nuwe terugploeg fasiliteit word vir Mei 2021 beplan, met konstruksie wat reeds in Januarie volgende jaar afskop. Terugploeg is formeel op 17 November 2020 in samewerking met mediavennoot GrootFM 90.5 in die Atterbury Teater bekend gestel. Die geleentheid is deur verskeie kommersiële boere, potensiële donateurs en sakelui bygewoon. Hoe die publiek kan help Aangesien die konstruksie van die Terugploeg-gebou binnekort begin, sal skenkings in die vorm van konstruksiemateriaal verwelkom word – bakstene en sement, roldeure, matte, lugversorgers, kombuistoerusting, vleisverwerkingsmasjinerie, ens. Kontant-skenkings is ook welkom. Alle skenkings kwalifiseer vir ’n 18A-belastingsertifikaat uitreik deur Atterbury Trust, om dit belasting-aftrekbaar te maak. As jy kan help, of meer wil weet oor Terugploeg, kontak vir Lood Bester by 082 925 1118 of Jani Doms by 076 313 7212 of epos hulle by lood@terugploeg.co.za of jani@atterbury.co.za Vir kontant-skenkings: Rekening: Atterbury Trust Nedbank: 1497004187 Takkode: 149745